Die Stuttgarter Weihnachtsmesse
Hondert kloine Ständla
Ka‘st om d Stiftskirch
Ond am Alta Schloß entdecka –
Tause‘t andere
Füllet onsern Marktplatz
Bis en d Ecka – –
Honderttause‘t Sacha
Locket de zom Gucka, Kaufa,
Essa, Schlecka – – –:
Eisebäh‘la, Portmanneela,
Saure Bomboo, süße Sääla,
Türkahonig, brennte Mandla,
Oimerla, Schäufela zom Sandla,
Rengla, Kettela, Armbandührla,
Christbaumkugla, Nippfigürla,
Magabrot ond herzige Puppa,
Warme Hausschuah, Zweeter, Juppa,
Goschahöbela ond Trompetla,
Pfeffernüß ond Bleisoldätla,
Honigkuacha, Hüet ond Soifa,
Hosaträger, farbige Schloifa,
Schee‘heitswässerla, Magasäftla,
Luftballoo‘, Kalender, Heftla,
Nuggat, Marzipa‘, Schoklad –
Alles liegt dr schee‘ akkrat
Uf de Ständlestisch parat!
Ond en dr Luft
Hangt a Duft
Von hoiße Rote, Senf
Ond röösche Brötla,
Von Zuckerwatte
Ond von Weihnachtslichter –
Ond überaal siehst lauter
frohe Gsichter!
Ond dia viele Menscha,
Dia schiabet ond drucket,
Standet ond gucket,
Suachet ond wählet,
Zahlet ond zählet –
Ond de Jonge pfluderet
Ond duderet,
Pfeifet ond räätschet,
Flötet ond trompetet,
Schlotzet ond mampfet,
Hopfet ond stampfet,
Ond machet sich manzig –
Ond dia Jaköb
Schreiet sich ihr Gurgel fransig,
Fuchtlet rom mit Füeß ond Händ,
Ond von ihre Ständ
Schallt dr s Lacha schochaweis! –
Ond jetzt, wo s a‘fangt z donkla,
Gòht a Glitzera a‘ ond Fonkla:
Gold ond Silber, älle Farba,
Gelb ond Rot ond Grea‘ ond Blau! –
Ond a bißle schneia tuats
Uf oimòl au! –
Ond die alte wenkelige Giebelhäusla
Mit ihre spitze Dächer
Hanget no a bißle weiter vor,
Ond vom Rôthausturm
Klengt s Glockaspiel dir
An dei‘ Ohr:
Ȇb immer
Treu und
Redlichkeit – – –!
Ond etzt stöhst dò,
Ond s Herz göht dr uff,
Ond dò guckst de om
Ond an Hemmel nuff:
D Stiftskirch wenkt rom,
S Alte Schloß lünst dr zua –
Ond uf oi‘mòl bist halt wieder
A kloiner Bua,
Kaufst a Honigstängele,
Schlotzst so ganz verstohla dra‘,
Ond de alt, verganga Zeit
Schlupft ganz hehlenga an de na‘,
Ond am End,
Ganz leis,
Fangst vor de na‘
Z schwätzet a‘! –
Ond was da schwätzst?
I sag dr s glei –
I hör de doch,
Stand doch drbei:
»O du schöne Stuagerter Weihnachtsmess,
I spürs…
Daß i di nia…
vergeß!«
Friedrich E. Vogt
Автор этого стихотворения родился ровно 120 лет назад в Штутгарте и стал известен благодаря стихам и песням, которые написал на своем родном швабском диалекте. В стихотворении Фридрих Эмиль Фогт передаёт атмосферу рождественской ярмарки у Старого замка, где множество лавок со всевозможными товарами и угощениями, а в воздухе запахи жареных колбасок, сладостей и горячего хлеба. Люди гуляют, смеются, выбирают подарки, дети играют и радуются. С наступлением вечера всё озаряется огнями, звучит колокольный звон и начинает падать лёгкий снег. Поэт испытывает тёплое чувство ностальгии, обещает, что никогда не забудет эту волшебную рождественскую атмосферу своего детства.
